Сагынам туган-үскән илемне,
Әллә кай җирләре ямьле иде;
Сөямен,
Шул илемне уйлап көямен.
Яшел болыннардан шаулап аккан
Сулары ла татлы, тәмле иде;
Бигрәк тә
Шул су буе тора йөрәктә.
Яланына чыгып, йөргән чакта,
Таныш иде аның бар ягы;
Түзалмыйм,
Туган-үскән илдән бизә алмыйм.
Кайтасым ла килә туган илгә,
Йөрәккәем шунда ашкына
Өзлексез,
Чит илләрдә ялгыз күңелсез.
Атам да анам, туганнарым,
Дус-ишләрем калды барысы да;
Барысы да,
Сагынып елыйм, йөрәк ярсый да.