Җәйге төн, якты төн,
Күктә ай елмая.
Шул айның шәүләсе
Тирбәлә елгада.
Ай күрә чәчәкле,
Бизәкле кырларны;
Көнләшеп тыңлый ул
Җирдәге җырларны,
Сандугач үзенең
Күңелле җырында
Белдерә сөмбелне
Сөюе турында.
Ә сөмбел оялчан,
Җырламый, көйләми,
Хисләре турында
Кешегә сөйләми.
Гармунчы төн буе.
Сыздыра, түзми ул.
Кемнедер юксына,
Нәрсәдер эзли ул.
Юксынма, моңайма,
Ташламас чибәрен.
Уйна син, уйна син,
Кавышу көйләрен!..