Тарих төпкеленә күз сал, кардәш:
Бабаларың шомлы бер таңда
Озатканнар нарасые белән
Илбаш — ханбикәне дошманга.
Сөембикә, Сөембикә —
Һәр татарның йөрәк парәсе,
Сөембикә, Сөембикә —
Милләттәшнең күңел ярасы.
Дошманыңның кара өннәрендә
Ниләр кичердең син, багалмам?
Ачы күз яшьләрең, рәнҗешләрең
Һәр буынга уктай кадалган.
Сөембикә, Сөембикә —
Һәр татарның йөрәк парәсе,
Сөембикә, Сөембикә —
Милләттәшнең күңел ярасы.
Дәүләтсезлек фаҗигасы белән
Ил төрелгән кара болытка.
Аттай эшләп, орышып арысландай,
Котылмаган халкым коллыктан.
Сөембикә, Сөембикә —
Һәр татарның йөрәк парәсе,
Сөембикә, Сөембикә —
Милләттәшнең күңел ярасы.
Бабаларның олы гөнаһларын
Юу өчен бар тик бер чара —
Ялварыйк Тәңрегә:
«Раббым, кичер», —
Дин кардәшләр, ягез бер дога.
Сөембикә, Сөембикә —
Һәр татарның йөрәк парәсе,
Сөембикә, Сөембикә —
Милләттәшнең күңел ярасы.