Ак бураннар (беренче вариант)

Күңел булмый, бураннарга
Чыгып бер бәйләнмәсәм.
Җанда — буран. Ярый инде
Буранга әйләнмәсәм.
Бураннарга буйсынам мин…
Буйсындыра да алам.
Торган саен якыная
Бураннар белән арам.

Ак урамнар буйлап киләм
Ак бураннар эченнән.
Гомеремдә әнә шулай
Күпме буран кичелгән.

Кышның утлы бураннары
Ярсып уйный канымда.
Кызу канлы бураннарны
Тыялмый бер канун да…
Бик риза мин язмышыма,
Бураннар язганына.
Ак бураннар белән барам
Мин якты язларыма.

Ак урамнар буйлап киләм
Ак бураннар эченнән.
Гомеремдә әнә шулай
Күпме буран кичелгән.

Ваша оценка: Нет Рейтинг: 5.6 (8 голосов)
« »