Тормыш шулай

Тормыш дигән алан — чиксез,
Күренми очы-кыры,
Бәхеткәйне эзләгәндә,
Юллар юк шул туп-туры.

Көннәр, айлар, еллар уза,
Бураннарда, давылда.
Тормыш шулай, гел юл ярып,
Туры килә барырга.

Тормыш дигән диңгез — тирән,
Сулары әче, тозлы.
Тормыш диңгезен кичәбез,
Ерып карларны, бозны.

Көннәр, айлар, еллар уза,
Бураннарда, давылда.
Тормыш шулай, гел юл ярып,
Туры килә барырга.

Тормыш дигән таулар — биек,
Түбәләре бик текә.
Диңгез кичеп, тауга үрләп,
Гомерләр үтеп китә!

Көннәр, айлар, еллар уза,
Бураннарда, давылда.
Тормыш шулай, гел юл ярып,
Туры килә барырга.

Голосов пока нет
« »