Синсез

/Нәфисә Хәкимова истәлегенә/

Ташлап киттең мине, көтмәгәндә
Ташлап киттең кайтмас җирләргә.
Тараталмас минем сагышымны
Кар-бураннар, ярсу җилләр дә.

Синсез — җәйләр салкын,
Синсез — кышлар ялкын.
Ник белмибез икән, ник белмибез
Яшәүләрнең, бергәлекнең хакын?

Безнең көзләр әле ерак иде,
Нигә язмыш усал шаяртты?
Чәчкә атар чакта кырау сукты,
Очар чакта канат каерды.

Синсез — җәйләр салкын,
Синсез — кышлар ялкын.
Ник белмибез икән, ник белмибез
Яшәүләрнең, бергәлекнең хакын?

Сагыш дәръясында ялгыз йөзәм,
Уйларымның тапмыйм ярларын.
Кем уйлаган гомер уртасында
Ялгыз килер, диеп, язларым.

Синсез — җәйләр салкын,
Синсез — кышлар ялкын.
Ник белмибез икән, ник белмибез
Яшәүләрнең, бергәлекнең хакын?

Голосов пока нет
Бу җыр , репертуарында бар « »