Актанышым

Юанычым, таянычым,
Талчыгып кайтыр төшем.
Кара кашлар, кара күзләр
Иле син, Актанышым.

Идел, күлләр, болыннарың
Былбыллы, тал-камышлы.
Мин дә синең нечкә талың,
Камышың, Актанышым.

Иделләрне иңләп уйный
Иртә-кичен таныш моң.
Акчарлаклар уйнатып, их!
Юксынма, Актанышым!

Таңнарыңда ишетелә
Кәккүкләрнең тавышы.
Мин дә синең ерактагы
Тавышың, Актанышым.

Бар минем өзелгән җырым,
Шул җырны башлар өчен,
Сагынып бер кайтам әле,
Түзалмам, Актанышым.

Таңнарыңда ишетелә
Кәккүкләрнең тавышы.
Мин дә синең ерактагы
Тавышың, Актанышым.

Ваша оценка: Нет Рейтинг: 9.3 (4 голоса)
« »