Әнкәй безне Сөннән алып кайткан

Әнкәй безне Сөннән алып кайткан,
Сөн суында юган иң элек,
Бишек җыры көйләп төннәр буе,
Без үскәнне көткән тилмереп.

Без биш бала үстек әнкәй белән,
Тик үсмәдек иркә кочакта,
Без әнкәйнең биш шатлыгы идек,
Биш кайгысы булдык кайчакта.

Без үскәндә күпме борчылулар
Күргән әнкәй гомер эчендә.
Онытмабыз, әнкәй, мәңге сине,
Рәхмәт яусын барсы өчен дә.

Без биш бала үстек әнкәй белән,
Тик үсмәдек иркә кочакта,
Без әнкәйнең биш шатлыгы идек,
Биш кайгысы булдык кайчакта.

Хәзер инде җиткән балалар без,
Кунак кына әнкәй янында.
Әнкәйләрнең олы йөрәгендә
Яхшылыгын сыйган барсы да.

Санап кына бетерерлек түгел
Әнкәйләрдән күргән игелек.
Әнкәй безне Сөннән алып кайткан,
Сөн суында юган иң элек.

Ваша оценка: Нет Рейтинг: 8.3 (17 голосов)
Бу җыр , репертуарында бар « »