Син сөеп карасаң (беренче вариант)

Сандугач тирәктә
Моң сибә йөрәккә.
Кил, бәгърем, син дә кил тыңларга.
Тыңлыйк без бергәләп,
Дөньялар түгәрәк,
Син барда янымда, син барда.

Сайрый да сандугач,
Кояшлы май тугач,
Сандугач — мәхәббәт җырчысы.
Сандугач сайрамый,
Болытлар таралмый,
Җаныңны сагышлар борчыса.

Йолдызлар янганда,
Күз ачып йомгандай
Ул безнең гомерләр арасы.
Сандугач сайраса,
Син сөеп карасаң,
Төзәлә күңелем ярасы.