Таң кызы җыры

Категория: көе сүзләре

/«Соңгы төн» трагедиясеннән/

Чәчләремне шаян җилләр
Уйнап сүтәләр;
Тын дулкыннар йөрәгемне
Назлап үтәләр.

Серле көчләр җилкәнемне
Сиңа илтәләр;
Төнбоеклар сөенечле
Хәбәр көтәләр.

Таң җилләре килүемне
Хәбәр итәрләр;
Алар, миннән алдан барып,
Җаның иркәләр.

Җылы нурлар төнбоекның
Яшен сөртәләр…
Сөю бәхетенә тусын
Таңнар, иртәләр.

Ваша оценка: Нет Рейтинг: 10 (2 голоса)
« »