Үпкәләмә миңа, үпкәләмә,
Үпкәлә син көзге җилләргә.
Миңа кала бары сагышлысы, —
Уйларымны җилләр җилгәрә.
Үпкәлә син соры болытларга —
Түбәнәйтте алар күгемне.
Тәбәнәк тә, тар да хәзер дөнья —
Сыйдыралмыйм анда күңелне.
Үпкәлә син аннан мәхәббәткә…
Нигә мине читләп уза ул?
Нигә килми?! Йөрәк ачык тора —
Алынган бит биге, йозагы.
Минем мондый җырлар җырлавыма
Ачы җилле көзгә үпкәлә.
Шул җилләрдән аралыйсың килсә,
Син мине дә кайчак үпкәлә…