Бу дөньяда сөю бар әле

Минем әле иң бәхетле чагым
Яннарымда сөйгән яр әле.
Саф хисләргә урын бетте, димә,
Бу дөньяда сөю бар әле.

Күңелемне күпме кара төннәр
Каралтырга теләп карады.
Төн таралды, күңел каралмады —
Бу дөньяда сөю бар әле.

Агартырга теләп чәчләремне,
Күп тарады кайгы тарагы,
Кайгы узды, чәчләр агармады —
Бу дөньяда сөю бар әле.

Замананың кырыс җилләреннән
Күпме җаннар бүген яралы.
Изгелектән өмет өзмик әле,
Бу дөньяда сөю бар әле.