Салкын тауда ачы җилләр исә,
Каен аяклары кар-бозда.
Ак каеным, син бик охшагансың
Керфекләре туңган яшь кызга.
Җил кыйныймы? Ник елыйсың ярсып,
Нечкә билле чибәр каенкай?
Син яшьлегем минем, бер кочаклап
Җылытыймчы сине, и дускай.
…Мин килермен тагын синең янга,
Тау буенда минем юл ятыр.
Бер-беребезне әгәр юатмасак,
Безне кемнәр килеп юатыр.
Җил кыйныймы? Ник елыйсың ярсып,
Нечкә билле чибәр каенкай?
Син яшьлегем минем, бер кочаклап
Җылытыймчы сине, и дускай.