Кешеләрнең кайтыр нигезе бар,
Эчәр суы, кочар каены.
Минем авыл күптән басу булган,
Башакларга сөйлим кайгымны.
Бетәр микән, бетәр-төзәлерме
Газиз туган җирем ярасы?
Еракларга киткән ул-кызларын
Көтеп елый авыл капкасы.
Җимерделәр туган нигезләрне
Таш бәгырьле җансыз кешеләр.
«Бу авылның һич юк киләчәге,
Авыл үлсен, бетсен» диделәр.
Бетәр микән, бетәр-төзәлерме
Газиз туган җирем ярасы?
Еракларга киткән ул-кызларын
Көтеп елый авыл капкасы.
Көтә безне туган нигезкәйләр,
Кичектерми кайтыйк, якташлар.
Тормыш салкыныннан һич туңмаган
Бездә әле кайнар йөрәк бар.
Бетәр микән, бетәр-төзәлерме
Газиз туган җирем ярасы?
Еракларга киткән ул-кызларын
Көтеп елый авыл капкасы.
Чит-ят җиргә киткән авылдашлар,
Чыгыгыз сез кайтыр юлларга.
Үксез ятим калган нигезләрнең
Киләчәге безнең кулларда.
Бетәр микән, бетәр-төзәлерме
Газиз туган җирем ярасы?
Еракларга киткән ул-кызларын
Көтеп елый авыл капкасы.