Җырларымда минем язмышым

Җырларымда минем күңел моңым,
Җырларымда шатлык, сагышым.
Җырларымда барлык гомер юлым,
Җырларымда минем язмышым.

Шат вакытта туды дәртле җырлар,
Моңсу чакта моңлы җырларым.
Йөрәгемнең назын, күңел моңын
Җырларыма кушып җырладым.

Гомеремнең юлын шау чәчәккә күмеп
Каршыладым күпме язларны.
Туганнарым һәм дусларым миңа
Бүләк итте күпме назларны.

Насыйп булса, тагын килер язлар,
Яңа җырлар туар күңелдә.
Нинди бәхет җырларыңда яшәү
Моң сөюче халкың күңелендә.