Сөю хакы

Яшьли кавышалар гашыйк ярлар,
Сөю тәхетендә кемнәр юк!
Тик шулай да гомер көзләренә
Парлап килгәннәргә тиңнәр юк.

Гел ал гына, гел бал гына түгел,
Төсен җуя тәүге балкышлар.
Сөю хакын хаклап яши белгән
Тугрыларга яусын алкышлар.

Бәхет юрап өзгән гөлләргә дә
Әрем керә кайчак, адашып.
Әрем ачыларын ширбәт итсәң,
Гомер кичеп була парлашып.

Гел ал гына, гел бал гына түгел,
Төсен җуя тәүге балкышлар.
Сөю хакын хаклап яши белгән
Тугрыларга яусын алкышлар.

Иләсләнгән чакта юләр яшьлек,
Кеше бәхетенә күз салып,
Бердәнберен саклап кала алган
Парлыларга карыйк тукталып.

Гел ал гына, гел бал гына түгел,
Төсен җуя тәүге балкышлар.
Сөю хакын хаклап яши белгән
Тугрыларга яусын алкышлар.