Йөртә безне язмыш төрле тарафларда,
Сирәк кайтыла туган якларга.
Яшьлек урамнары, сүнмәс хыяллары
Күңелләрдә мәңге саклана.
Гомерләр үтсә дә, көзләре җитсә дә,
Йөрәктә тынмый гел бер аваз.
Ул ерак еллардан, ул туган яклардан,
Ул безнең яшьлектән кайтаваз.
Каршы ала һаман безне юл буенда
Шаулап үскән бөдрә каеннар.
Каеннарның шундый моңлы шаулавында
Туган якның үзгә моңы бар.
Гомерләр үтсә дә, көзләре җитсә дә,
Йөрәктә тынмый гел бер аваз.
Ул ерак еллардан, ул туган яклардан,
Ул безнең яшьлектән кайтаваз.
Аермасын юллар безне туган яктан,
Ешрак кайтыйк туган төбәккә.
Салкын чишмәләре, сайрар кошлар моңы
Шифа булсын безнең йөрәккә.
Гомерләр үтсә дә, көзләре җитсә дә,
Йөрәктә тынмый гел бер аваз.
Ул ерак еллардан, ул туган яклардан,
Ул безнең яшьлектән кайтаваз.
