Балачак иленнән аерылабыз инде,
Безне алга дәшә гомер юллары.
Соңгы кыңгырау чыңлый никтер моңсу гына,
Сакланыр йөрәктә аның моңнары.
Кайларга илтсә дә безне язмышлар,
Мәңге истә калыр мәктәп еллары.
Бергә белем алган дуслар, классташлар,
Ямьле балачакның шатлыклы җырлары.
Әле кайчан гына тәүге кабат атлап,
Килгән идек бергә белем иленә.
Күпме еллар үткән бер дә сизелмичә,
Алга дәшә юллар, күңел җилкенә.
Кайларга илтсә дә безне язмышлар,
Мәңге истә калыр мәктәп еллары.
Бергә белем алган дуслар, классташлар,
Ямьле балачакның шатлыклы җырлары.
Ихлас рәхмәтебез бүген чиксез сезгә,
Тәрбия, белем биргән укытучылар.
Олы юлга дәшкән соңгы моңлы кыңгырау
Безнең күңелләрдә әле мең чыңлар.
Кайларга илтсә дә безне язмышлар,
Мәңге истә калыр мәктәп еллары.
Бергә белем алган дуслар, классташлар,
Ямьле балачакның шатлыклы җырлары.
