Баркарола

Агыйдел елгасы өстендә
Җәйге төн, айлы төн булганда,
Елгада көмештәй дулкыннар
Уйнаудан, шаулаудан тынганда

Шул чакта күңелдә дәрт биргән,
Моң биргән гүзәл җыр башлана.
Биектә, йолдызлы киңлектә
Нур сибеп, тулган ай чайкала.

Агыйдел буенда, болында
Чәчәккә салкын чык кунганда,
Көньяктан искән җил, таң җиле
Ярлардан томанны куганда,

Шул чакта күңелдә дәрт биргән,
Моң биргән гүзәл җыр башлана.
Җыр җанлы Агыйдел буйлары
Йөрәктә мәңгегә саклана.