Кыйгак

Шаулыйдыр нарат, һай, шаулыйдыр,
Кыр казлары канат кайрыйдыр.

«Кыйгак-кыйгак!» — каз кычкыра
Еракларга очарга.
Бер яшь егет ашкына ла
Сөйгән ярын кочарга.

Бөдрә лә чәчен җилфердәтеп
Тәрәз ачып бер кыз карыйдыр.

«Кыйгак-кыйгак!» — каз кычкыра,
Кайсы якның казы икән?
Ег(е)те алса, кызы барса.
Бәхет башы шул микән?

Уйсу ла җиргә су җыела,
Шунда кыр казлары коена.

«Кыйгак-кыйгак!» — каз кычкыра,
Бәпкәсен җуйган микән?
Ег(е)те көтә, кызы чыкмый,
Бигрәк назлы яр икән.

Сөйгән ләй кызын уйлый-уйлый
Арысландай егет боега.

«Кыйгак-кыйгак!» — каз кычкыра,
Кайсы диңгез казы икән?
Иләс-миләс егет башы,
Гыйшкы бигрәк каты икән.