Кыңгыраулар (беренче вариант)

Сөлге таккан көмеш дуга,
Дугада — кыңгыраулар.
Ак каеннар хәйран калып,
Тып-тын тыңлап торалар.

Кыңгыраулар, кыңгыраулар …
Юлларга сибелгәннәр. / Сөлгегә чигелгәннәр. /
Юл читендәге үләнгә
Энҗедәй сибелгәннәр …

Кыңгыраулы атлар белән
Кыңгыраулы таңнарда,
Туйга түгел, яуга ирләр
Киткән хәтәр чакларда!

Киткәннәр дә, кайтмаганнар —
Яу бит ул, уенмы ни! …
Кыңгыраулы тайлар гына
Болында уйнап йөри …