Карлар карала икән

Яшь чагында бер кайгы юк,
Уйный да көлә идек.
Гомеркәйләр бик тиз генә
Үтмәс дип белә идек.

Карлар карала икән лә,
Чәчләр агара икән.
Үтмәс дигән гомеркәйләр
Үтә, азая икән.

Сагындыра, уйландыра
Ат иярләгән чаклар.
Алтын биреп, көмеш биреп
Табылмый торган чаклар.

Карлар карала икән лә,
Чәчләр агара икән.
Алтын, көмеш, дөнья малы
Бетә, тарала икән.

Йөгереп мендек, йөгереп төштек,
Йөгереп үттек үрләрне.
Үкенмәслек итеп яшик
Алдагы гомерләрне.

Карлар карала икән лә,
Чәчләр агара икән.
Үтмәс дигән гомеркәйләр
Үтә, азая икән.