Яшьлегем капкаларының
Бикләрен алсаң иде,
Гомернең гүзәл чагында
Яшьлектә калсаң иде.
Яшьлеккә кайтып килергә
Сүз куштым хәтеремә.
Шул якларга борма юлны
Белә тик хәтер генә.
Тәүге ярым көтә сыман
Яшьлек капка төбендә.
Хәтта уйга бирелсәм дә,
Күңел назга төренә.
Яшьлегем капкаларына
Бер кагып карыйм әле.
Яшьлектә калган ярларны
Бер эзләп табыйм әле.
Яшьлегем капкаларының
Бикләрен алсаң иде,
Гомернең гүзәл чагында
Яшьлектә калсаң иде.
Яшьлеккә кайтам да хәзер
Капка төбенә чыгам.
Көнбагыш сузган булып син
Тотарсың кинәт кулдан.
Ә мин читкә тартылырмын,
Ә син кочып алырсың,
Беркемгә дә әйтелмәгән
Назлы сүзләр табарсың.
Яшьлегем капкаларына
Бер кагып карыйм әле.
Яшьлектә калган ярларны
Бер эзләп табыйм әле.
Яшьлегем капкаларының
Бикләрен алсаң иде,
Гомернең гүзәл чагында
Яшьлектә калсаң иде.