Җәй кебек гомерләр

Җәйләр узгач, көзләр кабат кайта
Якынайтып кышның буранын.
Вакыт калмый, туктап күзәтергә,
Гомерләрнең ничек узганын.

Кушымта:
Бу гомерләр нигә шулай уза,
Язгы ташу булып ашыгып.
Хыяллар бит онытылып кала,
Бетә алмый чынга ашылып.

Гомер озынлыгы билгесезгә,
Уза-уза юллар күренә.
Иң кадерле булган мизгелләре
Яшерелә күңел түренә.

Кушымта:

Җырлар кала кабат җырланырга,
Моңнар кала моңлы җаннарга.
Гамәлләрең кала күренергә,
Үлчәүләргә барсын салганда.

Кушымта: