Бала белән күбәләк

БАЛА:
Әйт әле, күбәләк,
Сөйләшик бергәләп:
Бу кадәр күп очып,
Армыйсың син ничек?

Ничек синең тормышың,
Ничек көн күрмешең?
Сөйләп бирче тезеп,
Табаламсың ризык?

КҮБӘЛӘК:
Мин торам кырларда,
Болында урманда;
Уйныймын, очамын
Якты көн булганда.

Иркәли һәм сөя
Кояшның яктысы;
Аш буладыр миңа
Чәчәкләр хуш исе.

Тик гомерем бик кыска:
Бары бер көн генә,
Бул яхшы, рәнҗетмә
Һәм тимә син миңа.

Ноты для песни: