Ялгыз имән (икенче вариант)

Туган якка кайткан-киткән саен ялгыз имән тора күзәтеп,
Еракларга төбәп күзләрен, ул каршы ала, кала озатып,
Әллә нинди уйлар кузгатып!

Каршылыйсың безне, озатасың, юлыбызны юрап яхшыга,
Туган якның гүзәл бизәге, син, ялгыз имән авыл башында!

Фатыйхасын алып бу имәннең, үтмәгәндер инде кем генә?
Күпме серне сагыш-куанычны җыйган имән күңел түренә.
Их, сөйләсем иде бер генә!

Каршылыйсың безне, озатасың, юлыбызны юрап яхшыга,
Туган якның гүзәл бизәге, син, ялгыз имән авыл башында!

Бураннарда юл күрсәтә имән, сыендыра җилдә, давылда,
Гашыйк ярлар шул имәнгә килеп, вәгъдәләшә бергә калырга.
Бик кадерле имән авылга!

Каршылыйсың безне, озатасың, юлыбызны юрап яхшыга,
Туган якның гүзәл бизәге, син, ялгыз имән авыл башында!