Сулар үргә акмый

Нигә моңлы тавышың, дип,
Сандугачтан сорадым;
Ул сайрады, мин моңайдым, —
Килде җыласыларым.

Сулар үргә акмый,
Яшьлек кире кайтмый, —
Уздырмыйк ла гомерләрне заяга.

Кошка охшасым килә лә,
Коштай очасым килә…
Тал-чыбыктай билләреңнән
Кысып кочасым килә.

Сулар үргә акмый,
Яшьлек кире кайтмый, —
Уздырмыйк ла гомерләрне заяга.

Сөрмәле күзләр икән лә,
Сөйгәне үзгә микән?
Өзелә бәгърем, өзелә,
Ни хәлләр түзим икән?!

Сулар үргә акмый,
Яшьлек кире кайтмый, —
Уздырмыйк ла гомерләрне заяга.

Ноты для песни: