Килмә яныма

Сөймәсәм дә «Сөям!» — диеп,
Зур гөнаһлы булыйммы?
Карлы яңгырларда калган
Гөлләр булып сулыйммы?

«Кадерлем!» — дип, эндәшимме,
Чит булсаң да җаныма?
Көткән кешем — ул син түгел,
Килмә, килмә яныма.

Очар кошның каурыйларын
Ялган ялкын өтсенме?
Яраларга дәва тапмый
Әрнеп гомер үтсенме?

«Кадерлем!» — дип, эндәшимме,
Чит булсаң да җаныма?
Көткән кешем — ул син түгел,
Килмә, килмә яныма.

Айдай бәхет вәгъдә итеп,
Күзләреңә карыйммы?
Мәнгелеккә иманымнан
Мәхрум булып калыйммы?

«Кадерлем!» — дип, эндәшимме,
Чит булсаң да җаныма?
Көткән кешем — ул син түгел,
Килмә, килмә яныма.
Көткән кешем — ул син түгел,
Килмә, килмә яныма…
Килмә, килмә яныма…