Саумы сез, авылдашлар

Язмыш шулай сыный безне,
Чит җирләрдә күп йөртеп.
Саг(ы)нуга түзми кайтамын,
Хисләрдән җырлар үреп.

Йөрәгемдәге хисләрне
Аңлар тик якын дуслар.
Сагындым, сагындым сезне,
Саумы сез, авылдашлар.

Йортларыңның күбесендә
Күренми инде утлар.
Кай арада яшьлек узган,
Сизелми аккан сулар.

Йөрәгемдәге хисләрне
Аңлар тик якын дуслар.
Сагындым, сагындым сезне,
Саумы сез, авылдашлар.

Әнкәмнең нурлы йөзләре,
Таң җиле иркәләве,
Төшемә кереп йөдәтер
Былбыллы иртәләре.

Көтә мине киң офыклар,
Чакыра ерак юллар.
Онытмам, онытмам сезне,
Онытмам, авылдашлар.
Онытмам, онытмам сезне,
Онытмам, авылдашлар…
Онытмам, авылдашлар…