Алда гомер бар микән?.. (Авыл көе)

Алтын-сары чәчләреңне
Син тарарсың, мин үрмәм /шул/.
Тауга менеп, ташка басып
Син карарсың — мин күрмәм.

Зәңгәр чәчәк ата торган
Гөлләр дә була икән /шул/.
Дөнья булгач, бик сагынган
Көннәр дә була икән.

Туңар булсаң, бәгеркәем,
Кии яңа бишмәтеңне /шул/.
Синең утларында янам
Теләсәң нишләт мине.

Быел килгән сахра кошның
Агы-күге бар микән /шул/.
Узган гомер хисап түгел,
Алда гомер бар микән?..