Чишмәләр иле син, туган як!
Зәмзәм су чишмәләр — саны юк.
Җырлыйлар, ургыйлар чишмәләр,
Җиремнең сусаган чагы юк.
Су ала яшь кызлар — чык кипми —
Чиләкләр кайталар җыр белән.
И хозур! Чишмәләр чылтырый, —
Ярлары ямь-яшел үр-келәм.
Ял итеп кит бездә, мосафир,
Отып кит чишмәләр көен син.
Туганнар ишетеп шат моңны —
Сөенсен, дошманнар — көенсен!
Чишмәләр иле син, туган як!
Еракка китмәгез су сорап.
Бу җирдә таулардан көй алып,
Чишмәләр яшиләр чылтырап…
/ Чыганак: Азнакай тамчылары (төз. С.Вилданова, М.Галиев) — Казан: Рухият, 2000. /
Ноты для песни:
Добавлено tatassr в СР, 22/10/2025 - 16:06
«
»