Сукмагыңа күктән йолдыз түшим,
Якты аем сиңа талисман.
Гафу итмәс мине үткәннәрем,
Кайтыр юлларымны ялгышсам.
Кызыл тавыңнан нурлар тарала,
Күңел түрендә җырлар ярала.
Әй туган җирем — газиз Әсәем,
Бәла-казадан безне арала, арала.
Еракларда диңгез-таулар күреп,
Сокланудан телсез калам мин —
Әҗәл даруларын, туган җирем,
Синнән генә ләкин алам мин.
Кызыл тавыңнан нурлар тарала,
Күңел түрендә җырлар ярала.
Әй туган җирем — газиз Әсәем,
Бәла-казадан безне арала, арала.
Сиңа атап язган җырларымны
Таң җилләре илгә таратсын.
Һәр карышың — минем бәхетемнән,
Сөю белән тулган тараф син.
Кызыл тавыңнан нурлар тарала,
Күңел түрендә җырлар ярала.
Әй туган җирем — газиз Әсәем,
Бәла-казадан безне арала, арала.
/ Әсәй (рус. Асе́ево) — Татарстанның Азнакай районындагы авыл /
/ Чыганак: Азнакай тамчылары (төз. С.Вилданова, М.Галиев) — Казан: Рухият, 2000. /
