Гомер яфраклары коела! (икенче вариант)

Үксеп-үксеп кара болыт елый,
Каен яфраклары коела.
Берәм-берәм кара җиргә төшеп,
Йомшак туфракларга сыена.

Каен яфраклары түгел, — гомер,
Гомер яфраклары коела!

Сары гына түгел, яшелләре,
Нигә яшелләре коела?
Үксеп — үксеп кара болыт елый,
Йөрәкләргә сагыш уела.

Каен яфраклары түгел, — гомер,
Гомер яфраклары коела!

Каен яфраклары җир куенында
Кышны каршыларга җыена.
Әй, яшь каен, ярсу язны көтеп,
Яшьлек мәхәббәте уенда.

Каен яфраклары түгел, — гомер,
Гомер яфраклары коела!