Урман җыры (икенче вариант)

Урманнарга барам карлар ерып,
Урманнарда язгы ярым бар.
Анда һәрчак — кошлар, ак чәчәкләр,
Анда һәрчак — яшел каеннар.

Акланнары калган — чәчәк юк,
Оялары калган — кошы юк.

Карлар яуган яшьлек урманыма,
Аһ, тапмадым дустым юлларын!
Бураннарга кушылып еладым да
Озын-озын уйлар уйладым.

Оялары калган — кошы юк,
Гәүдәләрем йөри, ушым юк.

Ничек китим яшьлек урманымнан? —
Монда минем язгы ярым бар.
Килеп чыгар төсле чәчәк тотып,
Һәм яшәрер төсле каеннар.

Оялары калган — кошы юк,
Күңелкәйләремнең кышы юк