Ике йолдыз (беренче вариант)

Синең йолдыз белән минем йолдыз
Галәмнәрне күпме гизмәгән.
Синең йолдыз белән минем йолдыз
Бер-бересен күпме эзләгән.
Бер-бересен күпме эзләгән.

Синең йолдыз белән минем йолдыз
Болытларны ертып тараткан.
Мине язмыш сине яратырга,
Сине яратырга яраткан.
Сине яратырга яраткан.

Синең йолдыз белән минем йолдыз …
Безнән дә нык кемнәр аңласын:
Бересе яңа дөрләп кабынганын,
Бересе соңгы мәле янганын.
Бересе соңгы мәле янганын.