Эндәшәм тәкъдиргә

Мөлдерәп түгелә,
Йөрәгем — әрнүдә.
Ничекләр түзәргә
Бу көчле хисләргә?
Моң тулы күңелдә.

Караңгы төннәрдә
Эндәшәм тәкъдиргә:
"Упкыннар читенә
Китердең никләргә?
Сыныйсың никләргә?"

Бер адым, бер генә —
Иң соңгы чикләргә…
"Түз, — диям үземә, —
Мин генә түгел лә
Аяныч хәлләрдә".

Мин һәрбер иртәдә
Эндәшәм тәкъдиргә:
"Иң дөрес фикердә
Яшәргә, түзәргә
Дәрман бир һәркемгә!"