Кабан күле

Серләреңне аччы, Кабан күле,
Сөйлә әле бөтен белгәнең.
Яттан сөйлә Тукай шигырьләрен,
Шушы булыр иң зур бүләгең.

Сөйләп калчы, Кабан, серләреңне…
Йөзгән, диләр, синдә пароход.
Үпкәләмә… сине гаепләмим,
Болай гына сорыйм, яратып.

Ничә еллар инде эндәшмисең,
Бер давыллап, ярсып ал, Кабан!
Урамнарга, мәйданнарга чык бер,
Сәлам тапшыр җиргә Тукайдан.

Эндәшмәде Кабан… Яшел күзе
Өмет катыш моң һәм зар тулы.
«Китмә» дигән кебек, дулкыннары
Аягыма килеп сарылды.

Тирә-юньдә дөнья шундый матур!
Ярларыңа басып карале.
Тукай нәселе киләчәккә бара,
Безнең белән син дә бар әле.

Эндәшмәде Кабан… Яшел күзе
Өмет катыш моң һәм зар тулы.
«Китмә» дигән кебек, дулкыннары
Аягыма килеп сарылды.