Чыксаң таңда иңнәреңә
Салып зәңгәр шәлеңне,
Таң җилләре килеп сөйләр
Сиңа минем хәлемне.
Шунда аңламый калмассың
Минем күңелем ярасын —
Бер чыланса керфекләрең,
Кичерермен барысын.
Сөйләр сиңа сандугачлар,
Сөйләми калмас әле —
Сандугачлы язгы таңда
Тәрәзәңне ач әле.
Шунда аңламый калмассың
Минем күңелем ярасын —
Бер чыланса керфекләрең,
Кичерермен барысын.
Сөйләп үтәр кыр казлары,
Түгә-түгә сагышын,
Мине төшерер исеңә
Язгы сулар агышы.
Шунда аңламый калмассың
Минем күңелем ярасын —
Бер чыланса керфекләрең,
Кичерермен барысын.